A diferença das homenagens de 2021 e 2023, onde o PP de Lobeira e Moinhos, inibiu-se, evitando o conflito, o PP de Bande mantém desde o primeiro momento umha atitude desafiante
Polo Comité pola Memória Histórica do Val do Límia | 04/09/2025
A homenagem ao antifascismo em Bande que se desenvolverá domingo 7 de setembro às 17.30 na área recriativa da Pombeira, adopta umha importáncia singular.
Nom nós referimos ao número de antifascistas que vamos honrar, nem ao lugar da OU-540 que se convertirá num novo espaço da memória do Val do Límia.
Referimo-nos à atitude beligerante e intimidatória do governo municipal de Bande com a nossa iniciativa.
A diferença das homenagens de 2021 e 2023, onde o PP de Lobeira e Moinhos, inibiu-se, evitando o conflito, o PP de Bande mantém desde o primeiro momento umha atitude desafiante.
A alcaldesa negou-nos chantar o monólito no lugar que consideramos mais adequado, na entrada de Bande vindo desde Vilameá, com um argumento ofensivo com as vítimas do fascismo. «Imaginade que também nos solicitam colocar um monumento os amigos do pam» (SIC).
Mandou arrancar todos os cartazes colocados na vila de Bande que anunciam a homenagem, pois segundo ela nom está permitido.
A realidade é que Bande carece dumha ordenança municipal que regule o exercício da liberdade de expressom, nem painéis habilitados para fazé-lo.
Porém, nom existe ‘problema’ com os cartazes de festas, verbenas e atividades do Concelho.
Semelha que é a alcaldesa quem decide onde se pode anunciar e que eventos podem fazé-lo.
O CMHVL nom se arreda das sua tarefa de recuperar a verdade, a justiça, a reparaçom e a dignidade da memória histórica.
Vamos seguir fazendo-o pese a quem lhe pese.
O governo municipal de Bande incumpre deliberadamente a legalidade vigente ao manter na praça de S. Roque o busto do teórico e dirigente falangista Eugenio Montes, inaugurado por Fraga em 1991. Um insulto para as vítimas e familiares do franquismo.
Solicitamos novamente a sua imediata retirada à Alcaldia e à Subdelegaçom do Governo de Ourense que atue de ofício para repor a legalidade, se Sandra Quintas segue negando-se a retirar o busto .
Solicitamos ao conjunto do antifascismo do Val do Límia, aos coletivos, associaçons e partidos que assomem as nossas reivindicaçons, estar ativamente presentes este domingo na Pombeira.
Se el primero en comentar