Lenine: “Salvo o poder todo é ilusom”

Este ano, devemos converter 2024 no ano Lenine. Um ano que seja determinante para a reconstruçom do comunismo revolucionário galego

Por Agora Galiza- Unidade Popular

Hoje, 21 de janeiro, cumprem-se 100 anos do falecimento de Vladimir Ilích Uliánov, Lenine. Eis polo que o comunismo revolucionário galego organizado à volta de Agora Galiza- Unidade Popular, reivindica a sua figura e a plena vigência do seu legado e projeto emancipador.

Como principal promotor do comunismo “a causa do amor e da beleza” em palabras de Gorki, Lenine segue sendo objetivo das campanhas de intoxicaçom promovidas pola burguesia.

Mas também da manipulaçom do reformismo e revisionismo que autodenominados como «comunistas», empregam-no para esvaziá-lo do seu conteúdo insurgente e revolucionário.

Consideramos que é imprescindível resgatar a alternativa libertadora que representa o marxismo, do sequestro ao que está submetido por parte das ‘esquerdinhas’.

Este ano, devemos converter 2024 no ano Lenine. Um ano que seja determinante para a reconstruçom do comunismo revolucionário galego.

Mas também para avançarmos na reorganizaçom de um espaço de coordenaçom internacional junto a outras forças comunistas que coincidem na necessidade de depurarmos o marxismo-leninismo da contaminaçom eleitoralista, pacifista e conciliadora que converteu a maioria dos partidos comunistas, em forças socialdemócratas inofensivas e altamente funcionais para perpetuar a ditadura do capital.

Sem resgatarmos o leninismo, nom teremos nengumha oportunidade de abandonar a derrota objetiva na que seguimos instalados.

Seguindo a trajetória do comunismo galego, representado por Benigno Álvarez e Moncho Reboiras, temos o dever histórico de contribuir para libertar o marxismo- leninismo das esterilizantes interpretaçons que o tenhem tergiversado.

Hoje, reivindicando a Lenine com a açom realizada, declaramos que mediante o processo Iniciativa Toupeira Vermelha, o nosso objetivo é reconstruir Primeira Linha, como destacamento comunista, combatente, patriótico e revolucionário galego.

LENINE É DOS COMUNISTAS, NOM DOS OPORTUNISTAS!

INDEPENDÊNCIA E PÁTRIA SOCIALISTA!

COMUNISMO OU CAOS!