Moncho Reboiras foi um comunista e um patriota, é um dos principais insumos da Revoluçom Socialista Galega, paradigma da Galiza que edificaremos.
Polo Comunismo Revolucionário Galego | 13/08/2025
Quem passou à História como Moncho Reboiras decidiu consagrar a sua vida à Causa da libertaçom nacional e emancipaçom social do povo trabalhador galego.
Foi assassinado 12 de agosto de 1975 pola policia espanhola, logo de ser detetado num andar do bairro de Canido de Ferrol. Após queimar a documentaçom e facilitar a fugida dos dous camaradas que na altura o acompanhavam, Moncho nom vacila. Numha mostra de coragem e heroicidade tenta atrair os esbirros franquistas e superar o cerco. Logo dumha perseguiçom é atingido num portal, e como a rendiçom nom estava contemplada na sua coerência revolucionária, fai frente ao inimigo com inteireza e determinaçom. Cai covardemente acribilhado nessa manhá, no portal do número 27 da rua da Terra do Ferrol proletário.
Sem sombra de dúvida Moncho foi um dos quadros mais destacados do movimento de libertaçom nacional galego na primeira metade da década de ’70, incorporando-se por méritos próprios ao frontispício dourado da História da Pátria como o organizador da resistência armada ao fascismo desde a trincheira do comunismo patriótico galego.
Por muito que o tentem maquilhar, reduzindo a sua biografia a construtor dos alicerces do movimento obreiro e do associacionismo cultural galego, desde 1974 Moncho tem como responsabilidade prioritária constituir a frente armada da UPG, participando em operativos que a dotem da imprescindível infraestrutura e logística. Nesse intenso período passa temporadas no Portugal de Abril e altera o seu aspecto físico para evitar ser identificado. O Moncho cabeludo e com bigode com o que passou ao imaginário coletivo da luita de libertaçom nacional galega, na realidade nom era mais que um disfarce, para eludir ser capturado.
Moncho Reboiras foi um guerrilheiro comunista galego que continuou a trajetória da resistência armada antifranquista e que empunhou o fusil vermelho dos milhares de obreiros e campesinhos que combatérom durante décadas a ditadura fascista imposta a sangue e lume no verao de 1936.
2025 é um ano carregado de efemérides: 80 aniversário da derrota do III Reich polo Exército Vermelho da URSS, 75 aniversário da morte de Castelao, 50 aniversário da derrota do imperialismo ianque no Vietname, 60 aniversário da morte do ‘Piloto’, 50 dos últimos cinco executados polo franquismo, … Mas 2025 para o Comunismo Revolucionário Galego destaca como o 50 aniversário da viagem à eternidade de Moncho Reboiras.
Nom contribuiremos para alimentar o deliberado confusionismo que acompanha a sua figura, nem ocultar e/ou maquilhar a treito final da sua biografia militante, edulcorando e manipulando-a polas miseráveis necessidades táticas da política espetáculo institucional. Reivindicamos o militante marxista-leninista integral, o Moncho guerrilheiro, o ‘degrau mais elevado da espécie humana’ em palavras do Che, o militante que consagrou a sua vida pola sagrada causa da Pátria Socialista.
Combatente pola causa proletária e a independência e soberania da Galiza, é um exemplo a seguir, um dos melhores referentes do combate e luita de um povo que nom se resigna a ser derrotado polo projeto supremacista e imperialista do capitalismo espanhol.
Moncho Reboiras foi um comunista e um patriota, é um dos principais insumos da Revoluçom Socialista Galega, paradigma da Galiza que edificaremos.
Que importa que nos matem se deixamos semente de vencer!
Honra e glória camarada!
Na Pátria, Imo 12 de agosto de 2025 [Ano Moncho Reboiras]
Se el primero en comentar