A IGM aprema a Estado e Xunta para que se poñan a traballar no recurso de Meirás ante a inminencia do remate dos prazos legais

Agarda que no pleno de mañá se produza un pronunciamento claro do Parlamento para instar a ambos executivos. A plataforma cre que hai base xurídica para opoñerse á sentenza e que, máis alá dos aspectos técnicos, a ética democrática esixe vontade política das tres forzas para opoñerse ao “relato franquista” do fallo

Pola Iniciativa Galega pola Memoria

A Coruña, 9 de marzo de 2021. A menos dunha semana para que remate o prazo de interposición, a Iniciativa Galega pola Memoria aprema ao Estado e á Xunta para que deixen de adiar a decisión política e se poñan a traballar na preparación legal do recurso contra a sentenza da Audiencia Provincial de A Coruña que obriga a indemnizar á familia Franco polos anos de ocupación do Pazo de Meirás.

Representantes da IGM mantiveron nos últimos días reunións cos tres grupos políticos presentes no Parlamento de Galicia. O BNG reafirmouse no seu total apoio á presentación do recurso por parte do Estado, principal actor no proceso, así como á adhesión ao mesmo da Xunta de Galicia, mentres que populares e socialistas comprometéronse, a instancias da plataforma, a instar a ambas administracións a recorrer, “sempre que existan posibilidades xurídicas” para facelo. A IGM agarda que os encontros deriven nun pronunciamento claro do Parlamento e que no Pleno de mañá mércores, no que se abordará o asunto, se inste tanto á Xunta como ao Estado a presentar recurso, tal e como solicitou a súa representación nas reunións.

Como voceiro do organismo, o investigador Carlos Babío, autor xunto con Manuel Pérez Lorenzo do libro Meirás: un pazo, un caudillo, un espolio, facilitou aos grupos que o solicitaron información que avalaría a existencia de soportes legais para recorrer o fallo. A IGM entende, en base ao minucioso e documentado traballo de ambos,  que hai base xurídica para opoñerse á sentenza da Audiencia Provincial que considera a familia Franco posuidora “de boa fe” do Pazo, e nomeadamente, ao feito de que estableza 1975 como data de inicio para o recoñecemento dos dereitos de posesión, cando os netos e netas do ditador non asumiron a propiedade ata decembro de 2017.  Porén, máis alá dos fundamentos legais para presentar recurso, a plataforma que agrupa o movemento memorialista galego insiste en que, como representantes de institucións democráticas, as tres formacións teñen “a obriga ética” de opoñerse a un fallo que asume o relato franquista e branquea a represión e o espolio levados a cabo polo ditador.  Ten claro que o de Meirás non é un debate material nin económico, que a loita polo Pazo non se iniciou para acadar un ben material senón para denunciar a impunidade franquista. Na loita contra esa impunidade,  Meirás é un símbolo, a icona dun discurso de denuncia sen paliativos ao xenocidio franquista e, polo tanto, totalmente contrario ao que recolle a sentenza provincial.

Be the first to comment

Leave a Reply

Tu dirección de correo no será publicada.




 

Este sitio usa Akismet para reducir el spam. Aprende cómo se procesan los datos de tus comentarios.