![]()
Nada novo! O PP de Bande já lhe denegou o ano passado ao CMHVL um lugar para chantar o monólito de homenagem às 9 vítimas mortais do fascismo neste concelho
Polo Comité pola Memória Histórica do Val do Límia | 25/03/2026
A alcaldesa de Bande Sandra Quintas vem de comunicar ao CMHVL que nom autoriza instalar na fachada da Casa Consistorial umha placa indicando que os baixos deste edifício funcionou como cárcere de presos e presas políticas a partir de julho de 1936, e em 1937 foi transformado na Prisom Central de presas políticas da Província de Ourense.
O dia 10 de outubro de 2025, mediante um escrito apresentado no Registo Municipal do Concelho, denunciamos que naquele espaço reduzido, sem as mais básicas condiçons higiénicas e sanitárias, chegárom a estar simultaneamente 120 reclusas com os seus filhos pequenos.
Que nesse lugar estivérom presas vizinhas de Bande e da comarca entre julho de 1936 a outubro de 1940.
Razons pola que solicitávamos que o Concelho de Bande, em colaboraçom com o Comité pola Memória Histórica do Val do Límia, na primavera de 2026, instalassemos na fachada da Casa Consistorial umha placa de bronze sinalizando este lugar como un dos espaços da memória, pois considerávamos que com «esta homenagem o Concelho de Bande dará um importante passo na restituiçom e reconhecimento institucional das vítimas da barbárie fascista. Sufragando assim umha dívida histórica contraída por Bande com a geraçom de homes e mulheres que no período republicano, consagrárom a sua inteligência, talento e energia a fazer avançar estas terras polos vieiros da conquista de direitos laborais e liberdades individuais e coletivas.
Deste jeito, num exercício de verdade, justiça, reparaçom e dignidade com as vítimas do franquismo, daremos um passo mais contra a amnésia imposta, inaugurando solenemente na fachada do Concelho de Bande umha placa de bronze que perpetuará a memória das futuras geraçons».
Neste escrito avançamos a recriaçom de dous posíveis desenhos da placa, a consideraçom do Governo Municipal de Bande.
REUNIOM DO CMHVL COM A ALCALDESA
16 de janeiro de 2026, após ter transcurrido mais de três meses da solicitude, umha delegaçom do CMHVL mantivo umha reuniom com Sandra Quintas, quem se comprometeu a estudar a solicitude e sufragar o custo da placa. Boas palavras para ganhar tempo …
Porém, hoje, dous meses depois, a requerimento nosso, responde negativamente à solicitude utilizando o argumentário habitual da falsa equidistância institucional que emprega o fascismo à hora de impossibilitar a recuperaçom da memória história antifascista e republicana.
«Estivemos vendo cos compañeiros e creemos que o concello é a sede da representación local e, como tal, representa a toda a veciñanza, independentemente da súa ideoloxía. As institucións deben ser espazos de reencontro. Unha vez feitas as consultas pertinentes, consideramos que non é o lugar oportuno. Ademais, non podemos promover que cada organización queira colocar alí placas ou letreiros».
Nada novo! O PP de Bande já lhe denegou o ano passado ao CMHVL um lugar para chantar o monólito de homenagem às 9 vítimas mortais do fascismo neste concelho, desqualificou publicamente a iniciativa e censurou utilizando meios municipais a propaganda que a anunciava.
QUEIRA OU NOM O PP, A PRISOM DE BANDE SERÁ SINALIZADA
Por muito que Sandra Quintas e o grupo de Governo do PP de Bande pretenda impossibilitar este modesto homenagem de desagravoo, o CMHVL sinalizará com umha placa de bronze que durante mais de 4 anos nos baixos da Casa Consistorial de Bande estivérom recluídos centos de presos e presas políticas.
Se el primero en comentar