A Deputaçom Provincial de Ourense branqueia o fascismo com orçamento público

A Deputaçom Provincial de Ourense investe 11.190.64€ em editar 400 exemplares do que semelha umha haxiografia de um dos mais destacados teóricos e propagandistas falangistas.

Polo Comité pola Memória Histórica do Val do Límia 

A Deputaçom Provincial de Ourense branqueia o fascismo com orçamento público.

A Junta de Governo da instituiçom provincial, na sessom ordinária de 20 de novembro de 2023, acordou fixar o PVP das publicaçons do exercício 2023.

Na listagem das obras asignadas aparece o livro “Eugenio Montes. O intelectual silenciado”, da autoria de Manuel Rivero.

A Deputaçom Provincial de Ourense investe 11.190.64€ em editar 400 exemplares do que semelha umha haxiografia de um dos mais destacados teóricos e propagandistas falangistas.

O Comité pola Memória Histórica do Val do Límia denúncia o esbanjamento de dinheiro público na ediçom de um livro que só pretende lavar a biografia de Eugenio Montes, umha figura intrinsicamente ligada ao regime franquista desde a década dos anos trinta até a sua morte.

Nom podemos mais que qualificar de infame vergonha esta publicaçom, e de deleznável a tentativa de maquilhar a quem inspirou o brutal acionar do terrorismo falangista que sementou dúzias de cadáveres de vizinhos antifascistas a nossa comarca a partir do 20 de julho de 1936.

Exigimos a Luís Menor, presidente da Deputaçom Provincial de Ourense, que reconsidere esta publicaçom e paralise a ediçom de um texto que incumpre o espírito e a filosofia da Lei da Memória Democrática em vigor desde outubro de 2022.

Apresentar Eugenio Montes como um simples “inteletual, erudito, culto e nobre”, é umha estafa, umha monumental falácia, umha expressom do pior revisionismo histórico que só contribui a gerar confusom e desinformaçom entre as geraçons mais jovens, umha infame labor cosmética da mais culta e refinada escória fascista, que nom aprovamos e ainda menos aplaudimos.

Resulta paradoxal que a decisom da Junta de Governo da Deputaçom Provincial tinha sido adotada 20 de novembro, no dia do aniversário de José Antonio Primo de Rivera, o admirado caudilho político de Eugenio Montes. Ironias da História!

Val do Límia, 29 de janeiro de 2024